#كذبوا_عليكم

فلسطين اليوم | أحمد أبو قمر

#كذبوا_عليكم لما حكوا إن المساعدات بتتدفق على غزة، في حين القطاع بحاجة إلى 600 شاحنة يوميا كحد أدنى والاحتياج الفعلي بتجاوز 800 شاحنة، وإلّي بفوت فعليا حوالي 200 شاحنة بس.

#كذبوا_عليكم لما قالوا إن الشاحنات زادت، في حين شاحنات المساعدات نفسها ما بتتجاوز 60 إلى 70 شاحنة يوميا أغلبها طحين ومعلبات، والباقي شاحنات تجارية بتنسيقات باهظة وأسعارها فوق قدرة أغلب الناس.

#كذبوا_عليكم لما حكوا إن الوضع الاقتصادي تحسن، بينما البطالة حوالي 80%، والفقر أكثر من 90%، و95% من سكان غزة معتمدين على المساعدات.

#كذبوا_عليكم لما روجوا للتعافي الاقتصادي، بينما اقتصاد غزة انكمش 83% في 2024، وكمّل انكماش 7% في 2025، وغزة فقدت عقود طويلة من التنمية الاقتصادية.

#كذبوا_عليكم لما قالوا إن عجلة الاقتصاد رجعت تدور، في وقت لسه المواد الخام والسلع الإنتاجية ممنوعة من الدخول بشكل كامل، وحتى أبسط مستلزمات المهن زي المسمار وسيخ اللحام وزيوت السيارات وغيرها، ممنوعة من الاستيراد.

#كذبوا_عليكم لما حكوا إن الأسواق استقرت، بينما أزمة السيولة لسه مستمرة ومفيش حلول لأزمة الكاش والعملة القديمة وآلاف الحسابات مجمدة وفقدان الثقة بالنظام المالي.

#كذبوا_عليكم لما قالوا إن الوقود بيدخل من المعابر، في وقت المفروض يدخل 50 شاحنة وقود وغاز يوميا وفق البروتوكول الإغاثي، واللي بفوت فعليا بين 7 و10 شاحنات في أحسن الأحوال.

فعلا #كذبوا_عليكم لأن الأرقام كلها بتقول إن غزة لسه بتعيش نفس الانهيار الاقتصادي إلّي أفرزته حرب الإبادة، ويمكن أسوأ.